5 bestu snjallsímaforritin fyrir skipulagðara líf

Nú hefst Meistaramánuður á morgun og hárréttur tími í dag að setja sér raunhæf og uppbyggileg markmið.

Heilsuvísir er búinn að taka saman 5 forrit sem þú getur hlaðið niður í símann þinn til að hjálpa þér við að ná betri árangri í þeim verkefnum og markmiðum sem að þú ætlar að setja þér.

Wunderlist



Wunderlist er mjög aðgengilegt forrit sem að minnir þig á það að klára þau verk sem að þú stillir inn á aðgerðarlistann þinn eða “to do listann”.

Í forritinu geturðu einnig sett inn þau markmið sem að þú vilt ná hverju sinni, hugmyndum sem að þú færð og innkaupalistann þinn.

Innkaupalistanum getur þú svo deilt með öðrum sem eru með sama forrit og öfugt, en hægt er að fá góðar hugmyndir af því hvað á að vera í matinn með Wunderlist.

Basecamp



Basecamp er frábært forrit sem heldur utan um verkefnin þín á þægilegan máta.

Í forritinu getur þú sett þér tímamörk á verkefnum, sem hjálpar mörgum við að klára þau, auk þess sem þú getur sett inn hugmyndir þínar og vangaveltur, sem gaman er að fletta upp síðar.

Forritið er einnig tilvalið til að setja í tölvuna þína.

Notið Basecamp til auðvelda ykkur lífið í vinnunni.

ATracker



ATracker er tímastjórnunarforrit sem er rosalega þægilegt og mjög auðvelt að læra á.

Dagatalið er alveg sérstaklega handhægt en þar getur þú sett inn alla þá fundi og öll þau verkefni sem að þú þarft að klára.

Þú getur svo reglulega kíkt á skífurit sem að vinnur úr þeim upplýsingum sem að þú settir í dagatalið.

Þá sérðu svart á hvítu (reyndar í lit í þessu tilfelli) í hvað þú eyðir tímanum.

Þar gæti margt komið á óvart!

Pomodoro



Pomodoro forritið er frábært fyrir þá sem eiga almennt erfitt með að einbeita sér að verkefnum.

Þú setur forritið af stað og tíminn rennur áfram í tuttugu og fimm mínútur.

Þá geturðu ákveðið hvort að þú viljir taka fimm eða fimmtán mínútna hlé áður en að tuttugu og fimm mínútna lotan hefst á ný.

Þannig gengur þetta koll af kolli… þangað til að verkefnið sem að þú varst að vinna að er allt í einu búið.

Vel gert!

Habit List

Habit List forritið heldur utan um markmiðin þín, hvort sem þau eru lítil eða stór.

Forritið er alveg tilvalið fyrir Meistaramánuðinn enda eru þar engin mörk sem að skilja að stór eða lítil markmið, en meiningin er sú sama í Meistaramánuði - að öll markmið, stór og smá, séu jafn mikilvæg!

Forritið heldur svo utan um þann árangur sem að þú ert að ná, hvað varðar markmiðin, auk þess sem Habit List heldur þér við efnið með áminningum.