Fjarvinna heldur víða áfram: Öryggi og algeng mistök

„Þegar að fjarvinna ílengist eins og nú hefur gerst vegna COVID-19 fara línur milli vinnustaðar og heimils að hverfa og förum við ósjálfrátt að slaka á okkar verklagi og vinnusiðferði,“ segir Arnar S. Gunnarsson tæknistjóri hjá Origo og bætir við 

Smátt og smátt leyfum við okkur að gera hluti sem við færum aldrei að gera í vinnunni og það getur því miður leitt af sér mistök.“

Fjölmargir vinnustaðir líta nú á fjarvinnu sem nýjan valkost og flestir gera ráð fyrir að fjarvinna verði meiri í framtíðinni en áður. Tæknin er ekki fyrirstaða lengur og margir í góðri aðstöðu til að vinna að heiman.

En hver eru algengustu mistökin sem fólk gerir í fjarvinnu?

„Þessi mistök tengjast oftast samfélagsmiðlum og vafri um netið sem endar með einum smell á óæskilega vefsíðu sem inniheldur einhverja óværu eða reynir að stela upplýsingum frá okkur með að villa á sér heimildum og nær í framhaldi að veikja allverulega öryggi þeirra gagna sem við vinnum með á tölvum fyrirtækisins,“ segir Arnar.

Vinna og persónulega notkun aðskilin

Að sögn Arnars er einnig mikilvægt að tryggja öryggi gagna fyrir vinnuna með því að gera greinamun á því hvernig við notum vinnutölvurnar okkar.

Í heimavinnunni þurfum við sérstaklega að hafa í huga að tryggja aðskilnað milli vinnunotkunar og persónulegrar notkunar og að vinnutölvan verði ekki nýja heimilisvélin sem allir fá óhindraðan aðgang að,“ 

segir Arnar.

Sem dæmi um einkanotkun bendir Arnar á atriði eins og að streyma sjónvarpsefni eða hala niður gögnum sem ekki tengjast vinnunni.

Þá segir Arnar mikilvægt að fólk læsi tölvunni og takmarki þannig aðgengi að henni. Að gera þetta snýst ekkert um að treysta ekki öðru heimilisfólki heldur að vernda gögn og fyrirbyggja ófyrirséð mistök.

Samkvæmt könnunum gekk fjarvinna mjög vel í samkomubanni og þótt mörg fyrirtæki geri ráð fyrir að draga nokkuð úr henni, er ljóst að viðhorf til fjarvinnu er að breytast og margir gera ráð fyrir að hún verði nýr hluti af sveigjanleika nýrra tíma. 

Til að tryggja öryggi þeirra sem áfram munu starfa í fjarvinnu þarf að vera tryggt að starfsfólk noti öruggar og vottaðar eða samþykktar fjarvinnulausnir af hálfu upplýsingatæknisviðs fyrirtækisins.

Arnar segir vinnuveitendur ekkert síður standa frammi fyrir áskorunum sem huga þarf að.

Vinnuveitendur standa hér frammi fyrir erfiðum áskorunum þar sem tryggja þarf aðgengi starfsmanna að verkfærum og gögnum til að sinni sínu starfi en jafnframt að tryggja öryggi án þess að það verði of hamlandi og framleiðni starfsmanns gjaldi fyrir.

Mikilvægustu atriðin til að hafa í huga hér er notkun á tveggja þátta auðkenningu, takmörkun réttinda á útstöðvar til breytinga og að tryggja notkun skilríkja til að verja þjónustur sem eru opnar á internetið,“ segir Arnar.