Allir að vinna í joggingbuxum? Fjarvinna í fatalufsum

Eflaust hefur fátt haft jafn mikil áhrif á fatastíl landsmanna þessa dagana og fjarvinnan að heiman síðustu daga. Að minnsta kosti benda birtingar á Facebook til þess að margt fólk sé klætt í frekar þægilegum fatnaði, joggingbuxur og inniskór þar með taldar flíkur. Að stunda fjarvinnu í þægilegum fatnaði hefur marga kosti í för með sér, styttri tíma tekur að klæða sig að morgni og hafa sig til svo einfalt dæmi sé tekið.

En hvers vegna við klæðum okkur öðruvísi í vinnu heima en að heiman?  Er þetta bara leti eða er þetta flóknari fyrirbæri en það?

Mátum okkur við vinnustaði

Líkleg skýring er sú að út á við er klæðnaður hluti af þeirri ásýnd sem við viljum skapa okkur sem fagfólk. Þannig getur klæðnaðurinn haft áhrif strax í atvinnuviðtali hvort við erum ráðin í tiltekið starf. Sem dæmi má nefna leiðbeiningar Ingu Steinunnar Arnardóttur ráðgjafa hjá Hagvangi sem fyrir stuttu gaf lesendum góð ráð fyrir atvinnuviðtölin. Sagði Inga Steina þá meðal annars: 

„Það er gott að velta fyrir sér hvernig starfsmenn viðkomandi fyrirtækis séu klæddir í vinnunni og reyna að velja sambærilegan klæðnað fyrir viðtalið.“

Myndum okkur skoðanir á fólki á sekúndum

Jón Jósafat Björnsson framkvæmdastjóri Dale Carnegie segir faglega ásýnd mikilvæga.

„Samkvæmt rannsóknum þá myndum við okkur skoðun á hvort öðru á aðeins nokkrum sekúndum. Það sem við segjum vegur 7% en ásýnd okkar og látbragð vegur 93%.“

Hann segir að þrátt fyrir að fólk sé kannski ekki að hafa sig jafn mikið til nú og að öllu jafna, megi ekki gleyma því að fjarfundir gera okkur sýnileg.

„Fagleg ásýnd er því mjög mikilvægt þó við sitjum fyrir framan tölvuna okkar á fjarfundi.

Ef við erum heima en á fjarfundi með viðskiptavini ættum við líka að hugsa um hvað er í bakgrunni. Uppvask eða óbrotinn þvottur í bakgrunni er til dæmis ekki heppilegt.

Þá segir Jón að ímynd starfsfólks og fyrirtækja sé samtvinnuð.

„Við sem starfsfólk erum alltaf hluti af ímynd fyrirtækisins og eigum alltaf að vera meðvituð um það.“

Að sögn Jóns erum við þó ekki aðeins að hafa okkur til fyrir vinnustaðina eða viðskiptavini því það hvernig við erum til fara hefur líka áhrif á okkur sálrænt.

„Að klæða sig vel og hafa sig til er svo líka mikilvægt fyrir sjálfsvirðingu okkar. Það býr líka til ákveðin skil á deginum.

Það að vakna, fara í sturtu og fara í vinnufötin gefur okkur tækifæri að fara í jogging fötin í lok dagsins og stimpla okkur þannig út í huganum.“

Nú er tími til sjálfskoðunar

Rúna Magnúsdóttir stofnandi The Change Makers sérhæfir sig í að aðstoða fólk við að markaðsetja sjálfan sig sem vörumerki. Hún segir klæðnað í vinnu oft tengjast því að flest fólk reyni ósjálfrátt að líkjast fjöldanum.

„Staðreyndin er að flest okkar reyna alltaf að reyna að passa inní einhver steriótýpu box, óháð því hver við erum í kjarnann.“

Alls kyns vangaveltur hafa vaknað upp núna þegar fólk vinnur að heiman.

„Fólk er að spyrja sig spurninga eins og: Er í lagi að vera í náttfötunum í vinnunni heima? Þarf ég að setja upp andlit og hár, eða get ég bara hoppað beint uppúr rúminu og á fundinn? Hver á að hugsa um börnin á meðan ég er á þessum vef-fundi?“ nefnir Rúna sem nokkur dæmi um vangaveltur starfsmanna þessa dagana.

Að sögn Rúnu er hins vegar tilvalið tækifæri til þess nú að hugsa um það hvernig við komum fram almennt, nú sé rými til sjálfskoðunar.

Rúna segir að hvort sem við erum í fatalufsum heima í fjarvinnu eða ekki, þá skipti alltaf máli að vera meðvitaður um sitt eigið viðhorf, venjur og viðbrögð.

Staðan sem við erum í í dag gefur okkur einstakt rými. Rými sem gefur okkur dýrmætt tækifæri í að endurskoða venjurnar okkar og viðhorf.