Hætti nánast að geta gengið og léttist um tæp­lega 100 kíló

Sveinn Hjörtur er nýjasti gestur hlaðvarps Sölva Tryggvasonar. Í þættinum lýsir hann því að honum hafi liðið á tímabili eins og hann væri að stimpla sig út og því ákveðið að taka sig á.

„Ég fór í markvissa vinnu fyrir um þremur árum þar sem ég ákvað að taka bæði hugarfarið, heilsuna og líkamann alveg í endurskoðun. Þetta byrjaði á ferli þar sem ég tók eitt skref í einu í að breyta öllu í lífsstílnum og síðan fór ég í hjáveituaðgerð, eftir að hafa undirbúið mig vel undir hana bæði andlega og líkamlega. Ég var kominn á mjög vondan stað líkamlega. Ég var farinn að lamast út af verkjum í baki og fóturinn öðrum megin var farinn að gefa sig algjörlega. Ég datt mjög reglulega og var kominn með mikil einkenni út um allan líkama, meðal annars þrengingu í mænugöngum. Ég var í raun kominn með rauða spjaldið og það var annað hvort að gera eitthvað í þessu eða að það væri bara búið að dæma mig alveg úr leik,“ segir Sveinn Hjörtur.

Þýðir ekkert að vaða á fólk í ofþyngd

Sveinn Hjörtur segir mikilvægt að fólk vaði ekki að manneskju í ofþyngd og segi henni að hún verði að léttast og að fólk geti verið mjög ónærgætið og í raun fordómafullt.

„Það var ekkert gaman að vera stöðugt kallaður hlunkur, bangsi eða annað þvíumlíkt. En að sama skapi er gott að hafa fólk í kringum sig sem gerir manni grein fyrir að maður verði að fara að huga að heilsunni. Ef fólk kemur frá stað væntumþykju og segir manni satt þá getur það hjálpað mikið,“ segir hann.

Hann segir verkefnið sem hann stóð frammi fyrir hafa verið ógnarstórt og að fyrstu skref hafi verið að kortleggja málin vel og gera hlutina í réttri röð.

„Ég er markþjálfi og erfiðasta verkefnið var að markþjálfa sjálfan mig. Ég var mest orðinn um 200 kílógrömm og það er mjög skrýtið fyrir mig að sjá myndir af mér frá þeim tíma. En það þýðir ekkert að dæma sjálfan sig. Ég hafði áður gert tilraunir til að létta mig og stundum náði ég að léttast mikið, en svo kom það alltaf aftur. Ég hef prófað allar leiðir, hvort sem það eru megrunarkúrar eða ofurduft, en það er ekki til nein töfralausn.“

Þá segir Sveinn Hjörtur að tilfinningar geti leitt til þess að fólk endi í mikilli ofþyngd og að gömul áföll geti sömuleiðis verið orsakavaldur að því.

„Fyrst af öllu verður maður að tala fallega til sjálfs sín þegar maður byrjar svona ferli og ná að elska sjálfan sig þar sem maður er og þannig byrja að gera hugarfarsbreytingu. Aðgerðin sem ég fór í hefði ekki skilað neinu ef ég hefði ekki tekið hugarfarið með inn í myndina líka. Heilsan mín í dag er allt önnur. Ekki bara vegna þess að ég er léttari. Ég fer reglulega í blóðprufur og það mælist allt betra. Hvort sem það eru vítamín, kólesteról, starfsemi lifrarinnar eða annað,“ segir hann.

Hefur marga fjöruna sopið

Bróðir Sveins var myrtur um borð í varðskipinu Tý í janúar árið 1980. Sá atburður hafði gríðarleg áhrif á alla fjölskyldu Sveins. Sveinn var aðeins tíu ára gamall þegar atburðurinn átti sér stað og segist strax hafa viljað skilja dauðann.

„Ég hét því þarna að ég ætlaði að verða prestur af því að ég taldi að það myndi hjálpa mér að skilja dauðann betur og líka gæti ég þá aðstoðað fólk sem myndi missa nákomna. Skrápurinn þykknar svo auðvitað með árunum, en þetta er eitthvað sem hefur setið með mér og allri fjölskyldunni alveg síðan. Ekki bara var það missirinn og sorgin, heldur líka það hvernig þetta gerðist. Hann var myrtur um borð í skipi. Ég man eftir því að öll umræða um málið var eitthvað sem fjölskyldan og sérstaklega mamma var ekki hrifin af. Það var auðvitað engin áfallahjálp á þessum tíma og fólk átti bara að halda áfram. Pabbi vann í lögreglunni og hann byrjaði bara strax að vinna. Auðvitað byrja örin smám saman að gróa, en það verður aldrei neitt eins eftir svona atburð,“ segir Sveinn.

Þá segist hann hafa orðið fyrir öðrum stórum áföllum í lífinu. Hann hafi alist upp á heimili þar sem alkólismi hafi haft mikil áhrif á heimilislífið og orðið fyrir kynferðisofbeldi í æsku.

„Það var ekki fyrr en fyrir nokkrum árum síðan að ég hætti að blokkera á kynferðisbrot sem ég varð fyrir þegar ég var tólf ára. Þegar ég áttaði mig á því hve mikil áhrif það hafði haft á mig leitaði ég til Stígamóta og ég er enn í strákahópnum þar sem er alveg meiriháttar. Þau hafa hjálpað mér alveg gríðarlega vel. Það er ljósið sem hjálpar manni að ná að þrífa til. Það er ekki hægt að þrífa neitt í myrkrinu og á meðan maður varpar ekki ljósi á hlutina er ekki hægt að laga þá,” segir hann.

Upplifði ýmislegt í dyravörslunni

Sveinn Hjörtur fer um víðan völl í hlaðvarpinu og ræðir meðal annars reynslu sína af því að starfa sem varðstjóri á Neyðarlínunni og við dyravörslu í miðbænum.

„Ég var einn af þeim fyrstu sem var alltaf í stunguheldu vesti í vinnunni og þá var hlegið að mér og fólki fannst þetta hálffáránlegt. Ég fékk öryggisbúnað í gegnum þá sem skaffa lögreglunni útbúnað og fannst það bara eðlilegt. Það er alveg svart og hvítt hvernig staðan er orðin núna miðað við það sem þetta var. Núna sjá flestir að það getur beinlínis verið stórhættulegt að fá menn í bakið á sér sem eru undir áhrifum efna og sumir eru vopnaðir og þar fram eftir götunum. Ég hef stundum sagt að það væri gott fyrir ráðamenn og í raun alla að prófa að vera með lögreglunni niðri í bæ um helgar til að sjá hvernig þetta er,” segir Sveinn Hjörtur. 

Hann hefur áður haft orð á öryggismálum dyravarða en dyravörður sem örkumlaðist eftir fólskulega árás fyrir utan skemmtistaðinn Shooters árið 2018 var félagi Sveins Hjartar. Hann gagnrýndi á sínum tíma harðlega hversu vægan fangelsisdóm árásarmaðurinn hlaut.

Þá hafi starfið hjá Neyðarlínunni ekki síður verið lærdómsríkt.

„Maður fékk innsýn inn í hluti sem flestir fá aldrei að sjá þegar maður tók á móti símtölunum þar. Allt frá fæðingu barna í gegnum síma, yfir í sjálfsvíg, alvarleg slys og glæpi. Aðalatriðið í því starfi er að geta alltaf haldið ró sinni og yfirvegun, geta brugðist hratt og örugglega við, en þjálfunin er eflaust orðin meiri í dag. Það þarf á sama tíma að huga að því að aðstæður og vettvangur sé öruggur fyrir þá sem koma á staðinn. Ég var líka í áfallateyminu og í því að fylgjast með hvernig fólkinu leið eftir alvarleg útköll og fleira þess háttar. Líklega þarf fólk með mjög sérstaka skapgerð til þess að veljast í svona störf,“ segir hann.