Grindarvíkurfréttir: Að draga úr streituvaldandi á­hrifum

Enda óvissan mikil. Staðan ógnvænleg. Samkenndin og samhugurinn sem betur fer algjör.

Það er eins og spennuhnútur hafi myndast í maganum hjá heilli þjóð.

Það sem er gott fyrir okkur öll er að viðurkenna þessar tilfinningar. Því þær eru eðlilegar, eiga fullan rétt á sér og engin ástæða fyrir okkur að reyna að berja þær niður eða þykjast ekki finna fyrir þeim.

Þvert á móti er gott að ímynda sér að við séum svolítið að taka utan um þessar tilfinningar með því að segja: 

Já, það er skiljanlegt að mér líði svona. Ég finn til með Grindvíkingum. Ég þekki jafnvel fólk frá Grindavík. Ég finn til með Grindvíkingum og þess vegna líður mér svona. Mér finnst þetta óhugnanleg staða. Mér finnst óþægilegt að vita ekki hvernig þetta fer. Og svo framvegis.

Og halda síðan áfram að reyna að gera okkar besta. Enda mun það gagnast Grindvíkingum best og öllum sem að málunum koma.

Sumum er þó að reynast það jafnvel erfitt. Finnst eins og fókusinn sé ekki til staðar í vinnunni né öðru. Fyrir vikið bætast á aðrar tilfinningar vanlíðan eins og: Ég er ekki að standa mig nógu vel. Ég er ekki að gera nógu mikið. Og svo framvegis.

Að fá samviskubit yfir þessum tilfinningum er jafnvel eitthvað sem margir kannast við. Finnst skrýtið að upplifa lamandi áhrif eða minni afköst í vinnunni, ekki einu sinni tengd né að þekkja fólk í Grindavík. Hvað er eginlega að mér? hugsa sumir.

Rannsóknir hafa þó sýnt til margra ára að fréttir í fjölmiðlum geta haft bein áhrif á okkur í lífi og starfi. Þótt við séum ekki að tengjast fréttaviðburðunum beint. Með þetta í huga er ágætt að huga frekar að líðaninni með því að skoða hvað við getum gert til þess að okkur líði betur, án þess að ætla að hrista þetta af okkur og taka dagana áfram á hnefanum.

Í umfjöllun Harvard Business Reviews eru þrjú ráð nefnd þessu tengt, sem mögulega geta hjálpað.

Dragðu aðeins úr fréttanotkuninni

Við getum alveg haldið áfram að fylgjast vel með en mögulega er það að auka á streitu og spennu hjá okkur ef við erum of upptekin af því að fylgjast með fréttum. Gott er að draga aðeins úr þessu og setja okkur jafnvel markmið um hversu oft eða mikið við erum að kíkja á nýjar fréttir yfir daginn.

Ró, slökun, kyrrð

Ein leið til að róa hugann okkar og upplifa smá spennulosun er að draga úr þáttum sem eru mögulega streituvaldandi eða að trufla okkur. Allir eru til dæmis þessa dagana að tala um Grindavík og svo framvegis þannig að ein leiðin gæti verið sú að vera með heyrnatól og hlusta á eitthvað sem okkur finnst áhugavert, róandi eða gaman; sögur eða tónlist.

Svona til þess að gefa okkur smá hvíld og róa hugann um stund.

Markmið um lausnir

Enn eitt atriðið er að setja okkur markmið um að skanna fyrst og fremst allt sem jákvætt er. 

Eru fyrirsagnir að tala um eitthvað sem gæti verið jákvæð þróun? Eru sérfræðingar að tala um einhver jákvæð teikn? Eru yfirvöld eða stjórnvöld að tala um hvernig Grindvíkingum verður hjálpað? Eru viðtöl við fólk um hvernig við getum staðið saman eða hjálpað?

Að setja fókusinn okkar á allt sem við mögulega teljum jákvætt hjálpar. Það sama á við um að draga úr því sem neikvæðast er. Eðlilegt er að í fréttum sé hluti af innihaldinu neikvætt og það sama á við um umræður fólks.

En ef viðhorfið þitt er að hafa trú á því að allir séu að gera sitt besta og unnið verði að málum eins og best verður á kosið, er auðveldara að stimpla sig út úr umhverfi þar sem fólk er að ræða á neikvæðum nótum um málin og/eða að draga úr kvíðahnút yfir neikvæðari fréttum.