Sól­ríkar borgar­ferðir og ljúfar að­ventu­ferðir með Úr­val Út­sýn

Það er frábær viðbót við stutt íslenskt sumarið að skella sér í notalega borgarferð til Evrópu í haust og njóta veðurblíðunnar og mannlífsins í bland við fallegar strendur, góða veitingastaði og fjörugt næturlíf.

Aðventan er tími þar sem borgir Evrópu fara í jólabúninginn og skarta sínu fegursta. Þá er gaman að upplifa jólastemminguna og rölta um skemmtilega jólamarkaði, komast í sannkallað jólaskap, gæða sér á góðum veitingum og kaupa nokkrar jólagjafir. Úrval Útsýn býður upp á úrval aðventuferða víðsvegar um Evrópu.

Einn sólríkasti staðurinn við Adríahafið

Einn sólríkasti staðurinn við Adríahafið er bærinn Budva í Svartfjallalandi. Bærinn er vinsæll hjá ferðamönnum enda býður hann upp á fallegar strendur, góða veitingastaði og fjörugt næturlíf. Bærinn er um 2.500 ára gamall, einn sá elsti við Adríahafið, og skartar miklum fjölda fallegra og gamalla bygginga auk þess að búa yfir ríkulegri sögu.

Strandlengjan við Budva er um 38 km að lengd og inniheldur flóa, kletta, höfða og auðvitað fallegar strendur.

Bærinn Budva er skapaður út frá ólíkum menningarheimum. Hann var á sínum tíma hluti af Rómaveldinu og má sjá leifar af rómverskri mósaík og mannvirkjum í kringum bæinn. Síðar tilheyrði hann Feneyska lýðveldinu sem skapaði mikið af núverandi sjarma sem býr yfir gamla bænum. Á síðustu öld varð Budva hluti af Júgóslavíu og er í dag bær í sjálfstæðu Svartfjallalandi og einn aðal ferðamannastaður landsins.

Úrval Útsýn býður upp á ferð til Budva þann 3. október. Veðurfar í október er milt og þægilegt með hitastigi milli 15 og 20 gráða. Það er því tilvalið að lengja sumarið og heimsækja þennan fallega sólarstað.

Lecce er falinn fjársjóður Suður Ítalíu

Ítalía býr yfir ótal spennandi borgum og er Lecce svo sannarlega ein þeirra. Lecce er oft nefnd Flórens suðursins vegna barokk-listar sem prýðir borgina. Hún er ein af elstu borgum Ítalíu og er af mörgum talin vera eitt best varðveitta leyndarmál Ítalíu hvað varðar sögu, arkitektúr og umhverfi.

Í Lecce má finna fjölda frábærra veitingastaða og margar áhugaverðar verslanir. Það er því afar auðvelt að gleyma sér í göngu um sögulegar gersemar borgarinnar, njóta þess að borða ljúffengan mat og upplifa líflegt andrúmsloftið.

Lecce er meðal annars þekkt fyrir skrautlegar byggingar og styttur og má þar helst nefna Dómkirkjuna og basilíkuna Santa Croce. Dómkirkjan er staðsett á einu fallegasta torgi borgarinnar, Piazza del Duomo en þar má einnig sjá Episcopio klukkuturninn og Palazzo del Seminario. Gamli bærinn er svo þekktur fyrir mikla sögu og fallegar byggingar.

Skelltu þér til Ítalíu í haust og njóttu þess að skoða fallegan arkitektúr, líflegt en um leið afslappað umhverfi, góðan mat og ítölsk vín.

Úrval Útsýn býður upp á ferð til Lecce þann 17. október. Veðurfar í október er frábært fyrir Íslendinga en meðalhitinn þá er um 22 gráður.

Sikiley er drottning Miðjarðarhafsins

Besti tíminn til að heimsækja Sikiley er á haustin og í ár býður Úrval Útsýn upp á ferð þangað 21. október. Sikiley, sem oft er nefnd drottning Miðjarðarhafsins, er stærsta eyja Ítalíu og um leið sú stærsta í Miðjarðarhafinu. Eyjan er hrífandi blanda af evrópskri- og Miðjarðarhafsmenningu og er svo sannarlega paradís matargerðar, menningar og loftslags. Landslagið á Sikiley er líka mjög fallegt með sínum ávölum fjöllum, hásléttum og fallegum dölum þar sem hið virka eldfjall Etna ber ósjaldan við himinn.

Menning eyjaskeggja er suðupottur með hráefnum úr ólíkum áttum og um margt frábrugðin öðrum menningarkimum Ítalíu enda má finna þar leifar frá grískum, fönískum, arabískum, rómverskum, býsönskum tímabilum sögunnar svo fátt eitt sé nefnt. Þetta má meðal annars sjá í matargerð, arkitektúr, tungumáli, hefðum og trúarbrögðum heimamanna.

Hitinn á Sikiley í lok október er himnasending fyrir landsmenn en meðalhitinn í október er á bilinu 19-24 gráður.

Ljósadýrð og jólamarkaðir í stærstu borg Eystrasaltsríkjanna

Það er mikil upplifun að heimsækja Riga í Lettlandi á aðventunni en borgin er sú stærsta meðal Eystrasaltsríkjanna. Borgin skartar sínu fegursta á þessum tíma með jólamörkuðum og ljósadýrð.

Riga er falleg borg sem gaman er að heimsækja og skoða allt árið. Þar er hægt gera góð kaup á alls kyns varningi og gaman er að njóta þeirra afþreyingar sem borgin hefur upp á að bjóða.

Gott er að fylgjast með mannlífinu frá einu af fjölmörgum kaffi- og veitingahúsum miðbæjarins og gera góð kaup í spennandi verslunum.

Riga var sett á fót árið 1201 og því er gamli bærinn í borginni aldagamall og um leið á heimsminjaskrá UNESCO.

Úrval Útsýn býður upp á aðventuferð til Riga 27. nóvember.

Berlín skartar sínu fegursta á aðventunni

Mörgum ferðamönnum finnst Berlín sjaldan eins falleg og þegar jólaljósin ljóma og borgin skartar sínum fegurstu jólaskreytingum á vel skreyttum torgum, götum og byggingum. Berlín hefur lengi verið vinsæll viðkomustaður Íslendinga á aðventunni en í borginni má finna ótal jólamarkaði þar sem oft má finna ilminn af heitu Glühwein fylla öll vit. Ristaðar möndlur, hunangskökur og annað góðgæti má finna nánast á hverju götuhorni.

Enginn verður svikinn af heimsókn til Berlínar á þessum árstíma enda borg sem er rík af sögu, hefðum og listum. Það er auðvelt að njóta lífsins í Berlín í aðdraganda jólanna og klára jólainnkaupin snemma. Úrval Útsýn býður upp á aðventuferð til Berlínar 12. desember.

Aðventutöfrar í Verona með beinu flugi

Borgin Verona á Norður Ítalíu er þekkt fyrir jólamarkaði sína sem hægt er að sækja frá miðjum nóvember og út desember. Mesta jólafjörið er á torgunum tveimur við hlið Piazza Erbe, sem eru Piazza dei Signori (einnig þekkt sem Piazza Dante) og Courtyard Mercato Vecchio.

Það er auðvelt að fyllast jólaanda þegar ráfað er um fjölbreytta viðarbásana sem eru margir staflaðir hátt af handverksvörum af öllum gerðum, allt frá hefðbundnum jólagjöfum til handgerðra minjagripa á borð við viðar- og ullarvörur, búningaskartgripi, keramík, handgerðar sápur, líkjörum, lúxussúkkulaði og þýskar kringlur og pylsur.

Nú er hægt að fljúga í helgarferð til Verona í beinu flugi en Úrval Útsýn býður upp á aðventuferð til Verona þann 5. desember.

Úrval Útsýn hefur um margra ára skeið boðið upp á fjölbreytt úrval borgarferða og sérferða, árið um kring, fyrir einstaklinga og hópa. Velja má um tilbúnar skipulagðar borgarferðir eða sérsniðnar ferðir fyrir smærri og stærri hópa. Áhersla er lögð á faglega og framúrskarandi þjónustu. Sendið okkur endilega fyrirspurn á [email protected] og starfsfólk Úrvals Útsýnar leysir málið.