Um­fjöllun: Ís­land - Kongó 30-28 | Ís­land vann Forsetabikarinn

Íslenska kvennalandsliðið í handbolta tryggði sér Forsetabikarinn á HM 2023 í kvöld með sigri á Kongó í úrslitaleiknum. 

Það var ein breyting á leikmannahópi Íslands fyrir leikinn í dag en Katla María þurfti að fljúga heim en í hennar stað kom Andrea Jabobsen á ný.

Íslands skoraði fyrsta markið í leiknum og var það Thea Imani sem skoraði það en eftir það komu þrjú mörk í röð frá Kongó og var það Ngombele sem skoraði tvö af þeim mörkum en hún var algjörlega óstöðvandi í liði Kongó. Staðan eftir sex mínútur var 1-3 en þá tók Ísland við sér.

Þegar um ellefu mínútur voru liðnar var staðan orðin 5-3 eftir fjögur mörk í röð frá Íslandi en þrjú af þeim mörkum skoraði Þórey Rósa. Ísland náði að auka forskot sitt í 8-4 áður en Kongó tók leikhlé.

Ísland náði að halda forskoti sínu þar til undir blálokin þegar allt virtist ganga gegn þeim og leikmenn Kongó gengu á lagið og jöfnuðu leikinn áður en fyrri hálfleikurinn var allur. Staðan 14-14 í hálfleik en Hafdís Renötludóttir var best í liði Íslands í fyrri hálfleiknum en hún varði hvorki meira né minna en tíu skot.

Seinni hálfleikurinn var gríðarlega jafn og skiptust liðin á að vera með forystuna. Sóknarleikur Íslands var ekki nægilega vel smurður og virtist á tíðum vera heldur tilviljunarkenndur. 

Þegar um tíu mínútur voru eftir var staðan hnífjöfn 24-24 en eftir það náði Kongó að komast í stöðuna 26-27 en þá tóku íslensku stelpurnar við sér. Þær áttu góðan lokakafla þar sem Kongó skoraði aðeins eitt en Ísland fjögur og lokatölur því 30-28 og íslensku stelpurnar lyftu því Forsetabikarnum í leikslok.

Afhverju vann Ísland?

Þetta var alls ekki sterkasta frammistaða Íslands á mótinu en sigur er sigur. Liðin voru gríðarlega jöfn allan leikinn en Ngombele var allt í öllu í liði Kongó og þegar hún varð þreytt undir lokin þá vantaði aðeins upp á hjá liði Kongó og Ísland nýtti sér það klárlega. 

Hverjar stóðu upp úr?

Elín Rósa Magnúsdóttir var valin best í leiknum en hún skoraði fjögur mörk og gaf þrjár stoðsendingar. Thea Imani var markahæst með sex mörk og á eftir henni var Þórey Rósa með fimm mörk.

Hvað gekk illa?

Íslandi gekk virkilega illa að ráða við Ngombele í liði Kongó. Það fór allt í gegnum hana en ef Ísland hefði náð að eiga betur við hana hefði sigurinn verið stærri.

Hér fyrir neðan má sjá þegar Ísland lyfti Forsetabikarnum.