„Þakk­lætið og brosið frá þeim gefur til baka“

Ís­lendingurinn Jóhann Bragi Fjall­dal er með annan fótinn í Malaví og hefur þar, á­samt fleiri Ís­lendingum, starfað náið með knatt­spyrnu­akademíunni Ascent Soccer þar í landi. 

Nokkrar ís­­lenskar fjöl­­skyldur hafa haft við­veru í Malaví undan­farin ár, dvalið þar á vegum Utan­­­ríkis­ráðu­neytisins sem vinnur þróunar­­starf þar í landi. Það var í tengslum við það starf sem Jóhann Bragi komst í kynni við Ascent Soccer knatt­spyrnu­akademíuna.

Það sam­starf varð til þess að það tókst að fjár­magna ferð akademíunnar á Rey Cup fót­bolta­mótið, eitt stærsta fót­bolta­mót hvers árs hér á landi, síðast­liðið sumar og gerði lið Ascent Soccer sér lítið fyrir og vann mótið í flokki A-liða í fjórða flokki.

Ekki ein­falt verk­efni

Nú er svo komið að tveir á­tján ára leik­menn akademíunnar, þeir Levin­son og Precious, eru komnir hingað til lands og munu verja næstu þremur mánuðum á reynslu hjá liði Aftur­eldingar.

„Þeir komu með liðinu hingað til lands í sumar en voru of gamlir til þess að spila með því á Rey Cup. Þeir störfuðu því sem nokkurs konar liðs­stjórar á mótinu og fengu um leið að æfa með nokkrum fót­bolta­liðum hér á Ís­landi, þar á meðal Aftur­eldingu og gerðu þar rosa­lega gott mót,“ segir Jóhann Bragi Fjalldal, einn þeirra sem stendur að baki komu leikmannanna hingað til lands.

„Það var tekið virki­lega vel á móti þeim, sér­stak­lega hér hjá Aftur­eldingu og fljótt skapaðist gagn­kvæmur vilji á að fá þá hingað aftur til lands og þá yfir lengri tíma. Sjá hvernig það gengi.“

Því var farið í að fjár­magna slíkt verk­efni og með hjálp góðra styrktar­aðila, góð­gerða­fé­laga sem og sam­fé­lagsins í Mos­fells­bæ eru leik­mennirnir nú mættir hingað til lands.

„Þetta er ekki ein­falt verk­efni. Í fyrsta lagi þurfti að fjár­magna flugið fyrir þá sem og uppi­haldið á meðan á veru þeirra hér á landi stendur. Svo þarf að skapa að­stæður hér svo þeir raun­veru­lega geti að­lagast. Þar hefur Aftur­elding staðið sig með mikilli prýði. 

Drengirnir dvelja hér hjá fóstur­fjöl­skyldu á vegum fé­lagsins. Þeir eru ekki bara að æfa fót­bolta heldur einnig að þjálfa ung­menni, fara í grunn­skóla og svona. Það er því búið til um­hverfi sem gerir þeim auð­veldara fyrir vikið að að­lagast Ís­landi. Við erum búin að fjár­magna dvöl þeirra fram í apríl og erum að vinna í því að fá inn fleiri styrktar­aðila svo þeir geti dvalið hér lengur.“

„Allir af vilja gerðir til þess að hjálpa okkur“

Dvöl Levin­son og Precious hér á landi síðasta sumar, á meðan á Rey Cup stóð, varð þess valdandi að þeim langaði ólmum að snúa aftur hingað til lands.

„Já okkur langaði alltaf að snúa aftur til Ís­lands,“ segir Precious. „Hér var ó­trú­lega gott að vera og svo fengum við fréttir af því að við gætum farið á reynslu til Aftur­eldingar. Við erum mjög á­nægðir með að fá það tæki­færi.“

Þeir fé­lagar hafa nú verið hér á landi í rúma viku við æfingar hjá Aftur­eldingu þar sem að þeir hjálpa einnig til við þjálfun yngri flokka hjá fé­laginu.

„Það hefur verið rosa­lega gott að vera hér,“ segir Levi­son. „Leik­mennirnir eru allir af vilja gerðir til þess að hjálpa okkur, þeir eru alltaf til staðar ef okkur vantar að­stoð. Þetta er því mjög á­nægju­leg og lær­dóms­rík reynsla fyrir okkur. Þetta er frá­bært tæki­færi fyrir okkur til þess að verða betri knatt­spyrnu­menn.“

Að sögn þeirra er mikill munur á að­stæðunum sem boðið er upp á hér á landi saman­borið við þær sem þeir hafa reynslu af frá Malaví.

„Mikill munur,“ segir Precious. „Að­stæðurnar heima eru ekki það góðar. Vellirnir eru ekki góðir og erum við því að njóta þess til hins ítrasta að æfa hér með Aftur­eldingu.“

Draumur fyrir þessa stráka að koma hingað

Og Jóhann Bragi segir flesta krakka sem koma inn í starf Ascent Soccer akademíunnar í Malaví koma úr fá­tæk­legum að­stæðum.

„Flestir þessir krakkar koma úr mjög fá­tæk­legum að­stæðum í þorpunum og hafa í raun og veru bara verið að spila fót­bolta á tásunum á moldar­bungum alla ævi. Svo komast þeir inn í þessa akademíu Ascent Soccer og spila og æfa þá við að­eins betri að­stæður.“

„Þær eru samt ekkert í líkingu við þær að­stæður sem boðið er upp á hér. Vellirnir í Malaví eru ekki góðir mest allt árið. Það er bara al­gjör draumur fyrir þessa stráka að koma hingað, spila á gervi­grasi og inn í fót­bolta­húsum.“

Það eru því mikil við­brigði fyrir þessa ungu menn að koma hingað til lands þar sem að­stæðurnar til fót­bolta­iðkunar eru langtum betri. Svo ekki sé talað um við­brigðin utan fót­bolta­vallarins, að koma hingað til lands yfir vetrar­tímann.

„Eitt­hvað sem þeir höfðu aldrei séð áður“

Magnús Már Einars­son, þjálfari Aftur­eldingar, er veru­lega á­nægður með inn­komu þeirra Levin­son og Precious.

„Þeir komu á nokkrar æfingar hjá okkur á meðan á veru þeirra hér á landi stóð síðasta sumar. Þeir komu hrika­lega sterkir inn í hópinn. Þetta eru frá­bærir leik­menn, með mikla tækni­lega getu, fljótir og maður sér fljótt að þetta eru góðir fót­bolta­menn. Við á­kváðum því í kjöl­farið á veru þeirra hér að leita leiða til að fá þá aftur til okkar. Og með hjálp frá styrktar­aðilum og góð­gerðar­sam­tökum hefur okkur tekist að fjár­magna dvöl þeirra næstu þrjá mánuðina.“

„Í drauma­heimi tekst okkur að fjár­magna veru þeirra til lengri tíma, út komandi keppnis­tímabil svo þeir geti verið hér yfir sumar­tímann líka. Þetta eru ungir og efni­legir leik­menn sem geta spilað bæði með öðrum flokki sem og meistara­flokki. Það væri því gaman að hafa þá hjá okkur til lengri tíma.“

Levin­son og Precious hafi að­lagast lífinu hér á Ís­landi mjög vel. Þrátt fyrir allt öðru­vísi að­stæður en þeir þekkja heima í Malaví.

„Þetta eru allt aðrar að­stæður. Þeir eru þó gríðar­lega þakk­látir fyrir þetta tæki­færi því að­stæðurnar hér hvað fót­bolta­iðkun varðar eru miklu betri en í Malaví. Í síðustu viku æfðum við í frosti og miklum vindi en þeir nutu sín mjög vel. Voru ekkert að kvarta en maður sá það þó á þeim eftir æfingu að þeir höfðu aldrei séð annað eins veður. Þetta var eitt­hvað sem þeir höfðu aldrei séð áður.

Þrátt fyrir það spiluðu þeir á fullu og stóðu sig vel á æfingunni. Bara ekkert mál. Hugar­farið hjá þeim báðum er frá­bært. Þetta eru frá­bærir karakterar og virki­lega gaman að sjá hversu mikið þeir eru að njóta sín hér í Mos­fells­bæ.“

Þakk­lætið skín í gegn

Þú nefnir þakk­lætið. Það skín ein­hvern veginn svo mikið í gegn þegar að maður talar við þá. Þakk­lætið fyrir að fá tæki­færi til þess að reyna fyrir sér í fót­bolta hér á landi.

„Ég held að þeir hafi beðið ansi lengi eftir því að fá svona tæki­færi. Að­stæðurnar hér, eins og ég nefndi áður, mun betri heldur en úti í Malaví. Þá erum við með gott lið hérna hjá Aftur­eldingu. Þeir fá því að taka þátt í góðum æfingum og strákarnir hér sem fyrir voru taka þeim mjög vel. Þeir eru því gríðar­lega sáttir og verður gaman að sjá eftir því sem lengra líður á þessa þriggja mánaða dvöl þeirra hér, þegar að þeir eru búnir að að­lagast enn þá betur, hvar þeir standa.“

Með hjálp frá Braga, styrktar­aðilum og góð­gerða­fé­lögum í kring hefur okkur tekist að láta þetta verða að veru­leika. Þetta er gefandi verk­efni og svo að sjálf­sögðu væri frá­bært ef þessir strákar gætu fengið að vera hér til lengri tíma og jafn­vel spilað með okkur. Tíminn verður bara að fá að leiða það í ljós, hvort að geta þeirra sé þannig, hvort þeir nái að að­lagast að fullu og hvort það náist að fjár­magna það.

Þetta er frá­bært verk­efni og mjög gaman að taka þátt í þessu. Þakk­lætið og brosið frá þeim gefur til baka. Þetta er bara þroskandi fyrir leik­menn Aftur­eldingar að fá hingað leik­menn frá öðrum menningar­heimi og læra af þeim. Þetta er gott fyrir alla.“

Farnir að venjast kuldanum

Og lítur Levi­son á þetta tæki­færi sem fyrsta al­vöru skrefi í átt að mark­miði sínu sem snýr að því að verða at­vinnu­maður í fót­bolta.

„Hér er stórt tæki­færi fyrir mig til þess að koma ferli mínum al­menni­lega af stað. Stóri draumurinn er að verða at­vinnu­maður í knatt­spyrnu og tel ég að­stæðurnar hér geta hjálpað mér að feta mig í átt að þeim draumi. Þetta er bara byrjunin á mínum ferli.“

Veður­farið á þessum tíma árs á Ís­landi getur verið ó­vægið og kalt, al­gjör and­stæða við hitann sem er ríkjandi í Malaví. Því hafa þeir Levin­son og Precious fengið að kynnast.

„Við erum farnir að venjast þessu,“ segir Precious Það er auð­vitað mun kaldara hérna heldur en í Malaví. Bráðum munum við ekki eiga í neinum vand­ræðum með þetta næstu vikurnar.“

Ís­land heppi­leg fyrsta lending

Þá gefur það sam­fé­laginu heima í Malaví í kringum Ascent Soccer úti í Malvía heil­mikið að sjá þessa stráka fá tæki­færi til þess að láta ljós sitt skína hér á Ís­landi eins og Jóhann Bragi segir okkur frá.

„Bæði sam­fé­laginu sjálfu og svo hinum krökkunum hjá Ascent Soccer sem dreymir um að gera slíkt hið sama. Það er mikil­vægt að hafa það í huga að við hugsum þetta sem lang­tíma verk­efni. Við viljum búa til á­kveðinn far­veg fyrir unga krakka frá Malaví til að koma hingað, æfa við frá­bærar að­stæður og fá tæki­færi til þess að sýna sig og sanna. 

Vegna þess að það er bara mjög erfitt fyrir efni­legt knatt­spyrnu­fólk í Afríku að finna sér fé­lags­lið í Evrópu. Það er bara mikil sam­keppni og Ís­land er bara mjög heppi­leg fyrsta lending. Það teljum við og viljum sýna fram á með þessu fyrsta skrefi Levi­son og Precious.“

Eftir að hafa talað við Levin­son og Precious var alveg kýr­skýrt hversu þakk­látir fyrir þetta tæki­færi hér á Ís­landi. Sömu­leiðis vöktu leik­menn Ascent Soccer at­hygli fyrir hugar­far sitt á Rey Cup síðast­liðið sumar.

Er þetta ekki dæmi um verk­efni sem getur nýst bæði Ís­landi og Malaví? Gætu til að mynda ís­lenskir krakkar ekki lært mikið af þessum strákum?

„Alveg hreint,“ svarar Jóhann Bragi. „Það er ýmis­legt sem ég tel að ís­lenskir krakkar geti lært af þessum strákum. Eitt af því er við­horfið. Fyrir þá er þetta al­gjör­lega ein­stakt tæki­færi og eru þeir á­kveðnir í því að sýna sig og sanna. Þá getum við líka horft á fót­bolta­legan lær­dóm af þessu. Þessir leik­menn koma með að­eins öðru­vísi nálgun, eins og ís­lenskir and­stæðingar Ascent Soccer á Rey Cup fundu kannski fyrir síðasta sumar. Þeir eru með mikla tækni, mikinn hraða. Það er ýmis­legt sem ís­lenskir fót­bolta­krakkar geta lært af þessum strákum.“