„Íslendingar eru algjörir bruðlarar“

Árið í fyrra var metsöluár hjá Kristjáni en hann segir mikinn meirihluta heitra potta á Íslandi vera hitaveitupotta. Sjálfur selji hann helst rafmagnspotta sem séu ódýrari í rekstri en hitaveitupottar. Þar að auki noti þeir mikið minna vatn.

„Þú mátt alveg búast við því að það fari þrjú tonn af vatni í eina pottaferð ef potturinn er eitt og hálft tonn. Þú ert kannski hálftíma í pottinum og svo náttúrulega ef þú lætur ekki renna í hann þá kólnar vatnið þannig þú þarft alltaf að láta renna og renna í hann. Þannig ég hugsa að það fari alveg minnsta kosti tvö tonn, þrjú tonn ef þú ert alveg klukkutíma,“ segir Kristján um hitaveitupotta en bætir því við að í þá fari bæði heitt og kalt vatn.

36 tonn af vatni yfir einn mánuð

Kristján segir fimmtán til tuttugu þúsund hitaveitupotta vera á Íslandi en að meðaltali fari þrjú tonn af vatni í pottana í hvert skipti sem þeir séu notaðir.

„Segjum bara að fólk fari að meðaltali þrisvar í pottinn á viku. Þrisvar sinnum þrjú tonn af vatni, það eru níu tonn af vatni á viku, sinnum fjórir. Þá notar hitaveitupottur 36 tonn af vatni yfir einn mánuð á meðan rafmagnspottur notar 1,5 tonn af vatni,“ segir Kristján.

Hann nefnir að sumir tæmi ekki úr pottunum og láti renna í þá allan sólarhringinn, þá séu vatnstonnin mikið fleiri.

„Sumir láta bara renna alveg stanslaust í hann, það er svo misjafnt hvernig fólk er með þetta. Íslendingar eru algjörir bruðlarar, það er bruðlað með allt.“

Ekkert betra en að sitja í pottinum með fjölskyldu

Aðspurður hvort virkileg þörf sé á öllum þessum heitu pottum á heimilum fólks segir Kristján pottana að sjálfsögðu vera munaðarvöru.

„Það er ekki nauðsynlegt en það er fátt betra heldur en að sitja úti í köldu veðri eins og núna með fjölskyldunni og spjalla. Ég meina, er nauðsynlegt að kaupa sér síma á tveggja ára eða eins árs fresti? Þarna slekkurðu á símanum, sjónvarpinu og útvarpinu, ferð út og ég held það sé svona eini tíminn sem þú ræðir virkilega við konuna og krakkana þína, það er í heita pottinum á kvöldin,“ segir Kristján.

Þannig þú myndir ekki segja að Íslendingar væru of mikið í þessu miðað við hversu margar sundlaugar og baðaðstöður við erum með nú þegar?

„Nei. Ég myndi segja að þetta væri kannski það eina rétta sem Íslendingar væru að gera í heiminum, það er að fara í heita pottinn, njóta lífsins. Þetta er ódýr skemmtun, þægileg. Segjum bara að ein heita potts ferð kosti þúsund kall eða tvö þúsund kall eða eitthvað. Það er alveg peningana virði að borga það til að sitja með fjölskyldunni í geggjuðu umhverfi úti í garði og hafa það næs í hálftíma, klukkutíma, tvo tíma, það er ekki dýrt. Bíómiði kostar nú bara tvo þúsund kall fyrir einn,“ svarar Kristján.

Nota almenningssamgöngur og njóta pottarins 

Jafnframt segir hann notkun á heitum potti vera eitt það ódýrasta og besta sem fólk geti gert. Það sé gott fyrir líkama og sál. Nauðsynlegt sé þá að vera með nógu góða einangrun til þess að bruðla ekki vatni í hitaveitupottum.

„Heitt vatn á Íslandi er ekki óþrjótandi auðlind, það er svona eiginlega kjarni málsins að menn þurfa aðeins að spara, það er ekki til endalaust af heitu vatni,“ segir Kristján.

Hann segir ekki dýrt að eiga pott og hvetur fólk til þess að taka frekar strætó í vinnuna, spara bensín og njóta þess að fara í pottinn.

„Skrúfa frekar niður í hitanum í tveimur herbergjum og sofa öll í sama herbergi og njóta þess að fara í pottinn,“ segir Kristján í gamni.