Barcelona á­fram í brasi

Slakt gengi Barcelona í spænsku úrvalsdeildinni hélt áfram í kvöld þegar liðið beið lægri hlut gegn smáliði Leganes. Barcelona hefur aðeins unnið einn sigur í síðustu sex deildarleikjum.

Fyrir leikinn gegn Leganes í dag var Barcelona í efsta sæti La Liga en Real Madrid mistókst að hirða toppsætið í gær eftir að hafa aðeins náð jafntefli gegn Rayo Vallecano. Leganes var hins vegar í fallsæti og því búist við sigri heimaliðsins.

Svo fór hins vegar ekki. Leganes náði forystunni strax á 4. mínútu þegar Sergio Gonzalez Poirrier skoraði og sama hvað leikmenn Barcelona reyndu þá náðu þeir ekki að skora jöfnunarmark. Liðið var með boltann 80% af leiktímanum og fékk færi til að skora en nýtti þau illa.

Hveitibrauðsdagar þjálfarans Hansi Flick virðast vera á enda. Barcelona byrjaði frábærlega í haust undir stjórn hins þýska Flick en síðustu vikur hefur hallað undan fæti og Barcelona hefur aðeins unnið einn sigur í síðustu sex deildarleikjum. 

Liðið er enn á toppi spænsku deildarinnar en jafnt Atletico Madrid að stigum sem á leik til góða líkt og Real Madrid sem er einu stigi á eftir í þriðja sæti.